(Parafraseando a Gabriel y Galán)

¡Señol Jues, no haiga naide qu’embarre su sentencia!
¡Embargal de toas las muertes los avíos
y las jocis afilás, los desvaríos
de esas ansias desbocás de la impacencia!

¡Señol Jues, arrebañe’l jondón de su concencia!
De la lágrima y la sangre nacen ríos
que desaguan en un mar d’escalofríos
sazonando la venganza con pacencia.

¡Señol Jues, ya pué usté dir pasando más alanti!
¡Arrempuje usté p’alanti ya sin mieo!
Si tién culpa que la paguen al instanti.

Pero a vel, Señol Jues, no caiga usté’n el enreo,
ni en las mesmas junciones d’andenanti,
y agile con la Ley sin titubeo.

A Sor Agustina
In memoriam
(Escrito en el I Aniversario de su muerte, febrero de 2007)

Otra menos, una menos y una más
d’esas monjas conocías dende antaño,
d’esas monjas que’n su fé y el su reaño
jueron téntigas d’empeño y, además,

‘pedigüeñas’, ‘pejigueras’ y ‘agnegás’,
sin movese una mijina del su escaño
por curá siempre a ca y cuando en el su daño
a ese enfermo que no quiso sé enjamás.

Con los jierros d’un corsé que l’astrujaba
pa jacer enderezá el su cometío;
con la juerza d’un debé que l’abrigaba,

jecho jielo entre sus deos derretío
jué’l coraje d’una ‘sor’ que siempre estaba
a la vera del enfermo entumecío.

Versos del poemario ‘Alreó’l tiempo’