Javier Feijóo

El llanto de los árboles barrunta
el frío del invierno que s’acerca,
la escarcha sobre’l agua de l’alberca,
braseros que a familias arrejunta.

Sus lágrimas no son chuzos de punta,
son pardas alfombrinas de piel terca
qu’el viento arremolina y jace tuerca
cuando arresopla juerte y las ayunta.

Se quean desnuínos y agotaos
jediendo con agine a su probeza
jimplando por su verde primavera.

Asina, mesmamente, acagazaos,
pa’l año dos veinte qu’espereza
barruntan qu’estará nuestra cartera.

Soneto a José María Gabriel y Galán

Manque pasin los añus, tú te queas
con tus versus que al airi s’esparraman
y en los árbolis de ‘Cánovas’ s’enraman,
pa caelsi endispués en las vereas

ondi agilan los vates sin correas,
los que jiedin a hombri, los que braman
y s’encaran al Jues por quienis aman,
los que icen asina sus ideas.

Lo mesmitu que jacin las poetisas
con coraji de jembras extremeñas
pergeñandu con versus tu memoria.

Mu nuevinu te juistis, con las prisas,
pa quear d’esta tierra santu y señas
en las tus ‘Extremeñas’ de la gloria.

Del poemario ‘Alreó’l tiempo’.